സംസ്ഥാനത്തെ എല്ലാ സര്‍ക്കാര്‍ - എയിഡഡ് ഹൈസ്കൂള്‍, ഹയര്‍സെക്കന്ററി, വി.എച്ച്.എസ്.ഇ. സ്കൂളുകളിലും ഹൈടെക് ക്ലാസ്റൂം പദ്ധതി നടപ്പിലാക്കുന്ന പ്രക്രിയ തുടങ്ങിക്കഴിഞ്ഞു. ഇതിന്റെ ഭാഗമായി 4775 സ്കൂളുകളില്‍ ഐടി ലാബുകള്‍ സ്ഥാപിക്കാനും 45000 ക്ലാസ്‌മുറികളെ ഹൈടെക്കാക്കാനും 493.5 കോടി രൂപ കിഫ്‌ബി അനുവദിച്ചിട്ടുണ്ട്. ഇതിന്റെ തുടര്‍ച്ചയായി സംസ്ഥാനത്തെ 9448 സര്‍ക്കാര്‍ എയിഡഡ് മേഖലയിലെ പ്രൈമറി-അപ്പര്‍ പ്രൈമറി സ്കൂളുകളില്‍ ഹൈടെക് ലാബുകള്‍ സ്ഥാപിക്കുന്ന പ്രവര്‍ത്തനങ്ങളുടെ പൈലറ്റ് വിന്യാസം 188 സ്കൂളുകളിലും
14 ഡയറ്റുകളിലും ഉള്‍പ്പെടെ 202 ഇടങ്ങളില്‍ ഈ മാസം പൂര്‍ത്തിയാകും
കേരള ഇന്‍ഫ്രാസ്ട്രക്ച്ചര്‍ ആന്റ് ടെക്നോളജി ഫോര്‍ എഡ്യൂക്കേഷന്‍ (കൈറ്റ്- ഐടി@സ്കൂള്‍ പ്രോജക്ട്) ആണ് പൈലറ്റ് വിന്യാസം നടത്തുന്നത്. ഇതിന്റെ ഭാഗമായി 1558 ലാപ്‌ടോപ്പുകളും 641 മള്‍ട്ടിമീഡിയ പ്രോജക്ടറുകളുടെയും വിന്യാസം ഓഗസ്റ്റ് 26-ഓടെ പൂര്‍ത്തിയാക്കും. പ്രൈമറി സ്കൂളുകളില്‍ ബ്രോഡ്ബാന്‍ഡ് ഇന്റര്‍നെറ്റ്, കളിപ്പെട്ടി-ഇ@വിദ്യ പേരില്‍ ഐടി പാഠപുസ്തകം, അദ്ധ്യാപകര്‍ക്കുള്ള ഐ.സി.ടി പരിശീലനം, സമഗ്ര റിസോഴ്സ് പോര്‍ട്ടല്‍, ഡിജിറ്റല്‍ ഉള്ളടക്കം, സ്കൂള്‍ ഐടി കോര്‍ഡിനേറ്റര്‍മാരെ തെരഞ്ഞെടുക്കല്‍ തുടങ്ങിയ മുന്നൊരുക്ക പ്രവര്‍ത്തനങ്ങള്‍ പൂര്‍ത്തിയാക്കിയതിന് ശേഷമാണ് ഹൈടെക് ലാബുകള്‍ സ്ഥാപിക്കുന്ന പ്രവര്‍ത്തനം നടത്തുന്നത്
പ്രൈമറി-അപ്പര്‍ പ്രൈമറി സ്കൂളുകളില്‍ താഴെപ്പറയുന്ന വിധത്തിലാണ് ഹൈടെക് ലാബുകള്‍ സ്ഥാപിക്കുന്നത്;
കുട്ടികളുടെ എണ്ണം : ലാപ്‌ടോപ്പ്, മള്‍ട്ടിമീഡിയ പ്രോജക്ടര്‍ എന്ന ക്രമത്തില്‍
0 - 50 : 2 , 1
51 - 100 : 4, 2
101 - 200 : 6, 2
201 - 300 : 8, 3
301 - 400 : 10, 4
401 - 500 : 12, 5
> = 501 : 15, 6
പ്രൈമറി തലത്തിലെ ഐ.സി.ടി പ്രവര്‍ത്തനങ്ങളുടെ ഫലപ്രദമായ അക്കാദമിക് മോണിറ്ററിംഗിനുവേണ്ടിയാണ് 14 ജില്ലകളിലേയും ഡയറ്റുകളില്‍ സംവിധാനം ഏര്‍പ്പെടുത്തുന്നത്. ഹൈടെക് ലാബിന്റെ പൈലറ്റ് പ്രവര്‍ത്തനങ്ങള്‍ നടത്തുന്ന സ്കൂളുകളില്‍ പ്രത്യേക പരിശീലനവും ഉള്ളടക്ക വിന്യാസവും നടത്തും. ഇതിന്റെ തുടര്‍ച്ചയായി 9260 പ്രൈമറി-അപ്പര്‍ പ്രൈമറി സ്കൂളുകളിലും ഹൈടെക് ലാബുകള്‍ സ്ഥാപിക്കാനുള്ള പ്രവര്‍ത്തനത്തിന് വിശദ പ്രോജക്ട് റിപ്പോര്‍ട്ട് കിഫ്ബിക്ക് സമര്‍പ്പിക്കാന്‍ തീരുമാനിച്ചിട്ടുണ്ട്.
പൈലറ്റ് പ്രവര്‍ത്തനങ്ങള്‍ക്ക് തി‍രഞ്ഞെടുത്ത സ്കൂളുകളുടെ ലിസ്റ്റ്
https://www.itschool.gov.in/2017/primaryschoollist1082017.pdf